പൂഞ്ഞാർ: രണ്ടു വർഷം മുമ്പ് മലങ്കര കുടിവെള്ള പദ്ധതിയുടെ ഭാഗമായി പൈപ്പ് ഇടാനായി വെട്ടിപ്പൊളിച്ച് പൈപ്പിട്ട ആനിയിളപ്പ്-വെട്ടിപ്പറമ്പ് റോഡ് റീടാറിംഗ് നടത്താത്തതിനെത്തുടർന്ന് നാട്ടുകാർ ദുരിതത്തിൽ.
ഈ റോഡിൽ കൂടി കാൽനടയാത്ര പോലും അസാധ്യമായ നിലയിലാണ്. കൂടാതെ കടുത്ത പൊടിശല്യംമൂലം റോഡിന്റെ ഇരുവശത്തുമുള്ള നൂറുകണക്കിനു കുടുംബങ്ങൾ ബുദ്ധിമുട്ടുകയാണ്. ശിശുക്കളും വയോധികരും ഉൾപ്പെടെ പ്രദേശവാസികൾ ആരോഗ്യപ്രശ്നങ്ങൾ നേരിടുകയാണ്.
രണ്ടു വർഷമുമ്പ് കുടിവെള്ള പദ്ധതിക്കുവേണ്ടി റോഡിൽ പൈപ്പ് ഇട്ടെങ്കിലും വാട്ടർ അഥോറിറ്റി പിന്നീട് പദ്ധതി നടപ്പിലാക്കാൻ വേണ്ട നടപടികൾ സ്വീകരിച്ചിട്ടില്ലെന്ന് ആക്ഷേപമുണ്ട്. കുടിവെള്ള പദ്ധതി പൂർത്തിയാക്കാത്തതുകൊണ്ടാണ് ടാറിംഗ് വൈകുന്നതെന്നാണ് പൊതുമരാമത്തുവകുപ്പിന്റെ ന്യായീകരണം.